Əmək müqaviləsi bağlayarkən AR ƏM ilə müəyyən edilmiş qaydada və müddətə sınaq müddətini müəyyən etmək işəgötürənin əsas hüquqlarından biridir (AR ƏM – Maddə 11.1).
Əmək müqaviləsi işçinin peşəkarlıq səviyyəsini, müvafiq əmək funksiyasını icra etmək bacarığını yoxlamaq məqsədi ilə sınaq müddəti müəyyən edilməklə bağlanıla bilər (AR ƏM – Maddə 51.1).
Sınaq müddəti 3 aydan artıq olmamaq şərti ilə müəyyən edilir (AR ƏM – Maddə 51.1).
Sınaq müddəti işçinin faktiki olaraq əmək funksiyasını icra etdiyi iş vaxtından ibarətdir (AR ƏM – Maddə 51.2).
İşçinin əmək qabiliyyətini müvəqqəti itirdiyi, habelə iş yeri və orta əmək haqqı saxlanılmaqla işdə olmadığı dövrlər (AR ƏM – Maddə 179) sınaq müddətinə daxil edilmir (AR ƏM – Maddə 51.2).
Sınaq müddəti göstərilməyən əmək müqaviləsi sınaq müəyyən edilmədən bağlanmış hesab olunur (AR ƏM – Maddə 51.3).
Əmək müqaviləsi bağlanılarkən aşağıdakı hallarda sınaq müddəti müəyyən edilmir (AR ƏM – Maddə 52) :
- yaşı 18-dən az olan şəxslərlə;
- müsabiqə yolu ilə müvafiq vəzifəni tutanlarla;
- hamilə və üç yaşına çatmamış uşağı olan qadınlara, habelə üç yaşınadək uşağını təkbaşına böyüdən kişilərə;
- təhsil müəssisələrini bitirdiyi ildə ixtisası (peşəsi) üzrə ilk dəfə işə götürülən şəxslərə;
- ödənişli seçkili vəzifəyə seçilmiş şəxslərə;
- iki ay müddətinədək əmək müqaviləsi bağlanılan şəxslərə;
- tərəflərin razılığı ilə müəyyən edilən digər hallarda.
|
Qeyd |
• Sınaq müddəti qurtaranadək tərəflərdən biri digərinə üç gün əvvəl yazılı xəbərdarlıq etməklə əmək müqaviləsini poza bilər (AR ƏM – Maddə 53.1).
• Sınaq müddəti qurtaranadək tərəflərdən biri əmək müqaviləsinin xitamını tələb etməyibsə, işçi sınaqdan çıxmış hesab edilir (AR ƏM – Maddə 53.2).
• İşçi sınaqdan çıxmış hesab edildiyi andan etibarən əmək müqaviləsinə yalnız AR ƏM ilə müəyyən edilmiş qaydada və əsaslarla xitam verilə bilər (AR ƏM – Maddə 53.2).
• Əmək müqaviləsində sınaq müddəti müəyyən edilərkən həmin müddət ərzində işçinin sınaq zamanı özünü doğrultmadığına görə işəgötürən tərəfindən əmək müqaviləsinə xitam verilməsi şərti göstərilməlidir (AR ƏM – Maddə 53.3).
• Sınaq müddətində özünü doğrultmamış işçinin əmək müqaviləsinə işəgötürənin əsaslandırılmış əmri ilə xitam verilə bilər (AR ƏM – Maddə 53.4).
